Ὡς εἶδέ σε Δέσποτα, ὁ Ἰωάννης ὁ Πρόδρομος,
πρός αὐτόν ἀφικόμενον,
ἔκθαμβος γενόμενος, ὡς εὐγνώμων δοῦλος, σύν φόβῳ ἐβόα·
Τίς ἡ ταπείνωσις Σωτήρ; τίς ἡ πτωχεία, ἥν περιβέβλησαι;
ὁ πλούτῳ ἀγαθότητος, ταπεινωθέντα τόν ἄνθρωπον,
ἀνυψώσας ὡς εὔσπλαχνος, ὡς αὐτόν ἐνδυσάμενος.
Ἄγγελος ἐκ στειρωτικῶν ὠδίνῶν, προῆλθες Βαπτιστά,
ἐξ αὐτῶν τῶν σπαργάνων τήν ἔρημον οἰκήσας,
σφραγίς τε πάντων τῶν Προφητῶν ἐδείχθης·
ὅν γάρ ἐκεῖνοι πολυτρόπως ἐθεάσαντο, καί
αἰνιγματωδῶς προεκήρυξαν,
τοῦτον βαπτίσαι ἐν Ἰορδάνῃ κατηξιώθης·
φωνῆς τε ἀκήκοας, Πατρικῆς οὐρανόθεν,
μαρτυρούσης αὐτοῦ τήν Υἱότητα· καί
τό Πνεῦμα εἶδες περιστερᾶς ἐν εἴδει,
τήν φωνήν ἕλκον ἐπί τόν βαπτιζόμενον.
Ἀλλ' ὦ πάντων τῶν Προφητῶν ὑπέρτερε,
μή διαλίπῃς πρεσβεύειν ὑπέρ ἡμῶν,
τῶν πιστῶς σου τελούντων τά μνημόσυνα.
Πηγή: Μηναῖον Ἰανουαρίου, σελ. 153 & 162